كشف الفنان حماده هلال للمرة الأولى تفاصيل الأيام الأخيرة التي عاشتها والدتها قبل رحيلها، خلال لقائه مع الإعلامي عمرو الليثي في في برنامجه "واحد من الناس" على شاشة الحياة، وكان هلال متأثرًا جدًا عندما تحدث عن والدته وبكى عند رؤية صورتها.
وقال هلال إن والدته رحلت من دون أن تعلم أنها مريضة سرطان، بل ظنت أن تعاني من هشاشة في العظام، مشيرًا إلى أنه طلب من الفريق الطبّي والمقربين أن لا يكشفوا حقيقة مرض والدته التي عانت منه لمدة 3 سنوات قبل رحيلها.
وأضاف هلال: أمي فضل عندها مرض السرطان 3 سنين وماكنتش تعرف لأني محبتش أعرفها، وده اكتشفناه لما قالتلى صدرها واجعها ولما روحنا للدكتور فقالي إن عندها "سرطان" وطلب نعمل تحاليل وللأسف لقينا السرطان في كل جسمها.
وتابع، قائلا: طلبت من كل اللي موجودين في المركز إن يفهموها انها بتتعالج من هشاشة عظام بسيطة وان كل اللي بتاخده فيتامينات، ولما قالى هاندى كيماوى ولكن رفضت وقلتله شوف البديل فقالى الهرمونات والأدوية الذكية، وفعلا بتروح تاخد العلاج وتقولى انا حاسة انى تعبانة فكنت بفهمها أن ده لازم عشان الأدوية.
وأضاف: "بعدها بشهرين تعبت والدتي تاني والدكتور قالى انا مضطر أديها كيماوى ولما حصل لقيت شعرها بيقع فقعدت أفكر في أى فكرة وفهمتها ان دى صبغة حطيناها بس وقعت شعرها وصدقتنى لانها كانت بتصدقنى في أى حاجة، وأنا مكنتش بكذب عليها ولكن عشان كان نفسى تقعد معايا أطول وقت ممكن".
وتابع: "ربنا متعبهاش في آخر لحظات حياتها ولكنها دخلت في فترة غيبوبة وتحس انها زى أكنها بقت طفلة ومش بتاكل غير فاكهة ومش حاسة بطعم أى حاجة، وكنا خايفين نوديها المستشفى بسبب الكورونا وبعد فترة روحنا المركز الطبى العالمى، ولكن جالى إحساس ان هى خلاص ماشية وروحت كلمت حد قلتله هاتلى كفن واخواتى ومراتى استغربوا جدا".
وبكى حمادة بشدة عندما شاهد صورة والدته ودعا لها بالرحمة قائلاً: "الله يرحمها عاشت حياة صعبة أوى وكانت ضهر أبويا في كل حاجة، وكانت ممكن متاكلش عشان إحنا نتعلم وعلمتنى إزاى أحافظ على النعمة وأزاى أحب أخواتى وأحافظ عليهم".
وأختتم حديثه قائلا: "أمى كانت وصيتها طول الوقت أن احافظ على أخواتى البنات وزوجتى لأنها كانت بتحبها عشان حنينة عليها قوى، ويا رب يجمعنى بيها في الجنة، ويا رب يبارك لكل واحد امه عايشه ويحافظ عليها ويا ريت كل وقت قاعد معاها متركزش في الموبايل وركز معاها هى وأملى عينك منها وحوش جواك هى فين لأن هايجيلك لحظة بعد الشر هتتمنى الوقت ده".
أضف تعليقا