وجهت الفنانة عبلة كامل رسالة عاجلة لعشاقها ومحبي فنها، وكذا كل من ينتحل شخصيتها عبر وسائل التواصل الاجتماعي، وبخاصة مروجي شائعات إصابتها بمرض السرطان، أكدت فيها أنها بخير وفي أحسن صحة وعافية، ولا تملك اية حسابات على مواقع التواصل الاجتماعي، كما ان الحساب المنسوب إلى ابنتها "مفبرك".
عبلة اختارت السيناريست بلال فضل، أكثر الكتاب قربا إليها، ينقل رسالتها عبر حسابه بموقع الفيس بوك، وقال بلال: الفنانة الكبيرة الأستاذة عبلة كامل طلبت مني أوصّل الرسالة دي لعلها توصل لأي حد بينشر إشاعات عن حياتها وصحتها: "عيب، والله العظيم عيب، لو الناس مش هتتقي ربنا وتخاف منه في وقت زي ده هتتقيه وتخاف منه امتى؟
وتابع ناقلا رسالة عبلة كامل: وإيه اللي هيستفيده إنسان من إنه يقلق حياة الناس بكلام كذب، بيدعي إنه بينشره لإنه محب أو معجب، أنا اخترت نمط حياة سعيدة بيه وراضية عنه، وما عنديش أي حسابات على السوشيال ميديا ولا هيبقى عندي في أي يوم من الأيام، ولا باتابع السوشيال ميديا ولا بانشر عليها أي شيء من أي نوع ولا مهتمة بده، وأتمنى اللي يشوف حساب منسوب ليا يساهم في قفله باللي يقدر عليه والحساب اللي عاملاه واحدة بتدعي إنها بنتي مالوش أي علاقة ببناتي فاطمة وزينب، وكل اللي بيتنشر فيه كذب.
اضافت عبلة كامل على لسان بلال فضل: والكلام اللي اتنشر في هذا الحساب عن إني مش فخورة بفني وبشغلي كله كذب وافترا، والحمد لله أنا في أحسن صحة وعافية، وباشكر الناس الطيبين كلهم على محبتهم وتقديرهم اللي أنا ممتنة ليها وباحمد ربنا عليها، وربنا يتقبل دعواتكم الجميلة ليا ويخلي لكم حبايبكم.
واختتم بلال فضل منشوره برجاء أن تتم مشاركة رسالة عبلة كامل حتى تصل إلى كل محبيها، وأضاف: أتمنى اللي يشوف الرسالة دي ويشوف بعدها كلام منسوب للأستاذة عبلة كامل يعمل ريبورت للحساب اللي بينشر الكلام ويساهم في قفله، وشكرا جزيلا لحضراتكم.
أضف تعليقا