ليلى عز العرب: زوجي لا يشاهد عمل اشارك فيه

تحدثت الفنانة ليلى عز العرب عن بدايتها الفنية في فيلم "ألف مبروك" مع أحمد حلمي خلال مداخلة هاتفية لبرنامج "اللمة تحلى" على "شعبي اف أم" مع شيماء السباعي " انا بحب ابدأ الحاجة من الصفر، ولما أحقق حاجة بحب أبدأ حاجة تانية من الصفر" وتابعت " قبل التمثيل كنت في مركز كبير في قطاع البنوك، كنت مدير عام رئيس قطاعين ده قبل نائب رئيس مجلس إدارة على طول، وقعدت في الشغلانة دي ٣٠ سنة فاكتفيت، و لما كنت في المنصب وبروح أمثل كان زمايلي بيفرحوا اوى" وأضافت "انا زوجة مطيعة جدا وعشان أمثل اتخانقت مع جوزي خناقة كبيرة، وبطلت فترة إرضاء له، بس لما جاتلى فرصة حقيقية اتمسكت بيها اللى هي فيلم "ألف مبروك" مع أحمد حلمى، وبعد نجاحي بقى زوجي داعم بس ما بيحبش يتفرج على أي حاجة انا فيها بس هو مش تليفزيوني عموما وبيقولى انتى بالنسبة لى مراتي مليش دعوة بالفنانة".
وتابعت "الناس بتنادينى في الشارع بالحاجة "سامانتا" كأنى ما عملتش حاجة في حياتي غيرها، يا إما أم الكبير ونادرا ما يتذكروا الف مبروك حتى الكشك اللى جنب البيت بيقولى أم الكبير جت" وعن أجمل كواليس صورتها فقالت "كانت في مسلسل "الكبير أوي"، وعلاقتي بمكي هو فعلا ابنى فأنا أم الكبير فعلا، كمان الناس اللى ورا الكاميرا ولادي وإحنا عيلة كبيرة وإن شاء الله يبقى ليا نصيب أكبر في الجزء السابع من الكبير" وأضافت "التمثيل حلو في اختلاف الأدوار، وتقديم البرامج يديكى فرصة أنك تقولي كلمة طيبة توصل للناس بس لولا التمثيل ما كنتش هقدر أقدم البرنامج".
وعن مسلسل "الاختيار" فقالت "أنا بسعد فيه حتى لو طلعت مشهد صامت، بحس كده إن ده توفيق ربنا، وده الذاكرة اللى هتفضل معانا كتير وكل ما ننسى نفتكرها، وفعلا قولت أنا نفسى أطلع أم كريم عبد العزيز و فعلا اتحققتلى الأمنية" وتابعت "انبسطت أوي لما كلموني من يومين وقالولى هنكمل العميل صفر مع أكرم حسنى لأنه دور مختلف جدا وهيبقى فيلم كوميدى فظيع".
واختتمت حديثها "الإفطار العائلي ولمة العيلة من العادات أو الطقوس اللى مفتقداها في رمضان، والسنة دي فطرت في البيت مرتين".