ماجد الكدواني : ذهبت إلي طبيب نفسي بسبب فيلم " تراب الماس"

كشف الفنان ماجد الكدواني، عن ذهابه لطبيب نفسي بعد تأثره الشديد بشخصية العقيد وليد سلطان في فيلم "تراب الماس".

وقال خلال الجزء الثاني من لقائه ببرنامج "صاحبة السعادة" الذي تقدمه الإعلامية إسعاد يونس بقناة "دي إم سي": "مروان حامد خلاني تشبعت من شخصية وليد سلطان في فيلم تراب الماس،  والشخصية شفطتني وبقيت أعيشها في حياتي بالبيت وأولادي ومراتي لاحظوا عليَّ إني متغير ومش طبيعي".

معاناة ماجد الكدواني نفسيًّا

وأضاف: "كانت بتحصل هبات في البيت ومراتي بقت تقول لي اللي بيحصل ده طبيعي لدرجة إنها كلمت الدكتور النفسي وحكت له على اللي بيحصل معايا، فقال لها دا ملف مفتوح ومتأثر بالشخصية وبمرور الوقت يخرج منها".
 
وتابع: "حبيت شخصية وليد سلطان وابتديت أتعامل إني هي أنا ولبستني غصب عني ودا أثر فيَّ نفسيَّا وعلشان كده لجأت لطبيب نفسي".

في الجزء الأول من نفس اللقاء، كشف الفنان ماجد الكدواني، عن تعرضه لحادث غريب في الكويت غيَّر مسار حياته حتى أصبح من المشاهير، وقصة مثيرة في زواجه.

حادث ماجد الكدواني في الكويت

وقال ماجد الكدواني خلال لقائه ببرنامج "صاحبة السعادة" الذي تقدمه الإعلامية والفنانة إسعاد يونس بقناة "دي إم سي":"حصل لي حادثة في الكويت غريبة، ببساطة إن حد صاحبي جدا معايا في المدرسة وكنا في ليلة امتحان الرياضيات وقال لي عايزك تغششني علشان أنت اللى ذاكرت فقلت له هنترفد وده مش مبدأ ومغششتهوش فجاء أخوه اللي كان في الثانوي وكان بيهزر معايا وإحنا خارجين من المدرسة وخبطني بالعربية وهو بيهوش وقتها وقعت ولقيت رجلي ورمت ولما روحت البيت كانت حالتي صعبة، اللي ضربني بالعربية وقتها اتصل عليا واعتذر واطمن عليا، والأيام فاتت من غير ما أعمل أي كشف أو فحص على رجلي، وبعد مرور 12 سنة على الحادث عرفت إن جالي تهتك في الأربطة".

بداية شهرة ماجد الكدواني

ولفت ماجد الكدواني: "وقت الحادث قلت لربنا ليه تسمح بحاجة شر ليا مع إني رفضت الشر ورفضت أغشش الولد، فاتضح إن ترتيبات ربنا عجيبة وإني مقولش ليه يا ربي واشمعنا أنا لإن جالي الرد قاطع وصريح ومهما ربنا اتأخر في الإجابة إلا إن الإجابة أبهرتني، وفي آخر سنة مسرح الجامعة في حلوان وإذ فجأة بعد العرض يطلبوا مني أقدم في المعهد الفنون المسرحية من اللجنة اللي شافت العرض وتضم سميرة محسن وأشرف زكي، وبعدين طلبوا أشوف موقفي من التجنيد الأول وبعدين لما روحت أقدم في التجنيد الدكتور قاللي انت متعرفش تقف أكتر من نصف ساعة لإن عندك تهتك في الأربطة وأخدت إعفاء من الجيش ودخلت المعهد العالي للفنون المسرحية علشان أبقى ماجد الكدواني الممثل وربنا رد عليا بعد 12 سنة ودي كانت إجابته".

إذا أعجبكِ هذا الموضوع إقرئي أيضًا : ماجد الكدواني: أبويا كان قاسي علينا وأنا وإخواتي انفجرنا من الكبت