قال الفنان هيثم شاكر: "ناس قليلين اللي عرفوا بالصدفة أزمتي المرضية الكبيرة، وأنا بحب دايمًا أشيل اللي حواليا محدش يشيلني، وأتحمل مسئولية الناس اللي حواليا خاصة عائلتي، ومش بحب أصعب على حد".
وتابع خلال لقائه ببرنامج "معكم" الذي تقدمه الإعلامية منى الشاذلي بقناة "سي بي سي: "خبيت مرضي بالسرطان عن والدتي الله يرحمها".
ولفت: "والدتي توفيت من غير ما تعرف إني مصاب بالسرطان، ولكن الحمد لله على كل حاجة حصلت لي".
وأشار: "أنا كنت تعبت واكتشفت أني عندي سرطان في القولون، وزي أي بني آدم حسيت أن حياتي انتهت واستسلمت وخلاص مستني الموت في أي وقت، وسافرت أتعالج بره ومحدش عرف بمرضي غير لزوجتي وأهلي باستثناء والدتي، واستسلمت في البداية وكنت شايف أن الحياة سودة وكنت مستني قضاء ربنا، وخلاص حسيت أن حياتي بتنتهي".
وتابع: "كان فيه طبيب نفسي يتابع حالتي وقاللي لو انت مستسلم ومستني قضاء ربنا يحصل طيب ما تحاول تعيش اليومين اللي فاضلين من عمرك، ومحدش عارف الغيب، وبعدين واحدة واحدة بقيت أتشبث بالحياة أكتر وأتعالج وكنت شغال في ألبوم "أحلى قرار" واختار أغاني الملحنين بيبعتوها لي على التليفون بسمعها وأبعتها للموزعين وأنزل مصر أشتغلها وأرجع أسافر وأكمل علاج، إلى أن ربنا سبحانه وتعالى أكرمني ومنَّ عليَّ بالشفاء".
وأكمل: "مهما كانت الدنيا سودة ربنا بيفرجها وفيه أمل، وربنا كبير وفوق كل شيء، وهو رب قلوب وعالم بكل حاجة واختبارات لكل صبرنا وإيماننا به".
أضف تعليقا