أحمد فهمي يكشف: "هنا الزاهد تغار عليّ من المعجبات ومن كلبتي الخاصة"

 

كشف الفنان المصري أحمد فهمي عن غيرة زوجته الفنانة هنا الزاهد من المعجبات، كما أنها تغار عليه من كلبته الخاصة "زيزي"، لافتًا إلى أنه لا يغار عليها بنفس الشكل.

حديث فهمي جاء خلال حواره مع برنامج "يوم ليك"، للإعلامية سمر يسرى، على قناة "الحياة"، وأكد أن هنا تتصل به بمكالمات الفيديو للتأكد من مكانه والتعرف على من بصحبته، وقال: "هنا بتغير عليا أكتر بكتير مني، ودائما تكلمني فيديو كول وبتغير من المعجبات".

وأضاف: "أنا بحب الكلاب جدًا وده سبب الخناقات بيني وبين مراتي هنا الزاهد، وهي ليها شخصية قوية جدًا وهي في البيت مسيطرة وبتزعل أني بهتم بالكلاب وبالذات الكلبة زيزي وبدلعها كتير فبتضايق وتقعد تعيط وقالت لي الكلبة دى هتكون سبب طلاقنا".

وكشف فهمي سر معاركه مع متابعيه على موقع إنستغرام قائلًا:" كنت على طول بشتم اللي بيشتمني على إنستغرام، ومن سنتين شتمت حد على إنستغرام، واتقفل الحساب شوية، لكن دلوقتي هديت كتير، عشان العصبية كانت بتاخد من طاقتي، أنا مبردش غير على قلة الأدب وليس النقد، ومرة أحمد السقا قالي لازم تهدى شوية، وحكالي على قصة الولد اللي شتم والدته على حسابه وراح جابه من بيته وبعد كده سابه والولد اعتذر له".

وأكد أحمد فهمي، أن الهجوم على مسلسله "رجالة البيت"، يقف وراءه فنان كبير صديق له، قائلًا: "أعمالي بتنجح أوي، أو بتنجح، والهجوم على المسلسل كان غريب، أيوة فيه مشاكل واعتذرت عنها لكنها لا تبرر الهجوم الكبير عليه".

وأضاف: "أنا مش طول الوقت بطل العالم، لكن عمري ما وقعت، والهجوم غريب، ومقصود وموجه، وعارف اللي وراه بالاسم، والمشكلة أن هذا الفنان لا توجد بيننا منافسة أنا في حتة وهو في حتة، وممكن يكون شن الحملة عشان كنت برفض أشتغل معاه".

واستدرك فهمي، مؤكدًا أن الفنان المقصود ليس محمد رمضان، وقال: "كان فيه خناقة بيني وبين محمد رمضان واتصالحنا فعشان الناس متظنش إني بأتكلم عن رمضان فأنا بأكد إن مش هو".

أضف تعليقا