رسالة من إبنه الفنانة الراحلة ماجدة لمن يهمه أمر أولاده

وجهت غادة نافع ابنة الفنانة الراحلة ماجدة رسالة إلى سكان الساحل الشمالي العشوائيين قائلة: " ارجوكم محدش يزعل من كلامي، لعلها تكون مصدر تنوير والهام لمن يهمه امر اولاده".

وتبعت عبر صفحتها في "فيسبوك": "يا ناس فوقوا و ربوا عيالكم !! ربوا عيالكم قبل فوات الاوان، ليه عيال في سن ١٥ سنه تشرب خمرة !!! ليه بنات تصاحب و تروح تقضي اليوم في بيت صاحبها !! ليه العيال معاها فلوس بالالفات لدرجة انهم في السن ده خروجتهم يتغدوا في ساتشي !! ليه بنات تعمل عيد ميلادها ١٦ سنه كأنه فرحها !! ليه نعلم ولادنا ان كل شيء مباح و ان الفلوس ملهاش قيمة !! ليه من سن ١٥ سنه البنت تلبس Valentino and Gucci!!! ليه الساعة ال Rolex دلوقتي !!! طيب ايه اللي هيبسطهم لما يكبروا ؟؟؟

وسألت غادة: "ليه نطلع جيل بيقيم أصحابه علي حسب عندهم فلوس قد ايه !!!! والله و الله انا مبحبش أقارن بس أصحابها في كندا آخرهم جزمة converse و لو خرجوا راحوا السينما مينفعش ياكلوا بره علشان ميصرفوش كتير ... لكن في نفس الوقت بيصرفوا آلاف علي رياضة و تمارين و كورسات ، المسألة كلها هي ثقافة أولويات ... انا فعلا مصدومة من حجم المنظره اللي الجيل ده هيتربي عليها، احنا مكناش كده ".

واضافت: "حقيقي فعلا كان فيه عري بس فيه رقي،  وحقيقي كان فيه خروج بس مكنش فيه اسفاف ،وحقيقي مكنش فيه حجاب منتشر بس كان فيه إلتزام، وحقيقي كان فيه ماركات بس للشياكة مش للمنظرة لمن استطاع اليها سبيلا
كان فيه خروجات بس من غير بذاءات
كان العيب عيب مش حاجة عادى".

وختمت قائلة: "انا شايفة ان انعدام الاخلاق والنخوة بقت من العاديات .. انا اسفة .. يمكن انا دقة قديمة .. ويشرفنى ان ولادى كمان يكونوا دقة قديمة .. واتمنى ويشرفنى ويسعدنى انى اجوزهم ناس معتدلين ودقة قديمة زينا .. متعوب على تربيتهم .. عارفين معنى القرش الحلال والعيب والحرام وعينيهم مليانة ومش محتاجين يبينوا ماركة مايوهاتهم عشان يبانوا انهم ولاد ناس ... لانهم اصلا ولاد اصول
لازم الولاد يتعلموا".