رامي صبري : كنت أعمل في فرقة الفنان محمد الحلو قبل الشهرة

أكد الفنان رامي صبري، أنه لا يعترف بالحظ، وأن هذه الكلمة لم تصادفه في حياته الفنية، وأن كل ما وصل له بفضل جهده وتعبه على مدار سنوات طويلة، مشيرًا إلى أنه عمل في كورال عدد كبير من المطربين ومنهم الفنان محمد الحلو.

وشارك رامي صبري، جمهوره عبر حسابه الرسمي على "فيس بوك"، بصورة من الماضي، وآخرى من الحاضر جمعت بينه وبين صديق عمره الموزع الموسيقي محمد سمير، ليمنح بها الشباب جرعة من الأمل والاستمرار في الاجتهاد، قائلًا: "صوره من ٢٣ سنة تقريبًا، الفرق بينهم كبير جدا في الصورة اللي فوق كنت بشتغل كورال مع الفنان الكبير محمد الحلو، وكنت وقتها ببتدي أشتغل علشان أفهم يعني إيه مسرح وجمهور، وإزاي أتعامل مع الناس في الشغل، وكنت دايما عارف أنها مرحلة تعليمية وهاتمشي مش هقف عندها علشان كده مكانش عندي طموح فيها، فضلت أشتغل كورال مع معظم النجوم ساعتها لحد ما لحنت لفضل شاكر وعامر منيب الله يرحمه وبعدين شيرين اول ما ابتدت.. وكل ده عارف إن هدفي لسه مجاش".

طموح رامي صبري في مجال الغناء

وأضاف: "الصورة اللي تحت بعد كل اللي فات والتعب والمجهود الكبير جدًا ربنا كرمني كرم كبير جدًا وميزني من وسط فنانين كتيرة جدًا وخلاني أكون واحد من أهم نجوم العالم العربي،  الموضوع كله صدقني في (الطموح) لو انت بتحب نفسك ومأمن بنفسك وعندك الاصرار انك هتوصل لمكان انت مش فيه دلوقتي، صدقني هتوصل بس تصدق نفسك، ومفيش حاجة اسمها (حظ) دي كلمه محصلتش معايا".

وتابع: "مع حبي للموسيقي وطموحي وأنا ماشي فيها في واحد معايا في نفس الصورتين، وهو أخي وصديق العمر والموزع الموسيقي وعازف الكيبورد  محمد سمير، هو كمان طموحه كبير جدًا وابتدي معايا في الصورة اللي فوق لحد ما بقي أحد أهم موسيقين مصر وبيلعب مزيكا مع أهم نجوم عالمنا العربي، ولسه مكمل معايا من ٢٣ سنه لحد الآن وهو مدير فرقتي الموسيقية".

رامي صبري لا يعترف بالحظ

واستكمل رامي صبري: "عاوز أقول في الآخر طموحك وحبك لنفسك هايوصلك، ماترميش شماعه الظروف علي نفسك وتقول ظروفي وحظي وتدخل في مود مش هايوصلك لحاجة، هاتوصل هاتوصل صدقني اشتغل علي نفسك اوي وحط في نفسك انك اهم واحد في العالم ولازم الناس كلها تعترف بيك . واول ما هاتنجح كله هيجري وراك ويسقف لك، الفرق بين الصورتين (الطموح فقط)، صباح التفاؤل والنجاح".

إذا أعجبكِ هذا الموضوع إقرئي أيضًا : بعد اتهام محمد رحيم له بسرقة ألحانه.. رامي صبري: بعتذرلك قدام الناس وده توارد أفكار